النرجسية مش معناها إن الشخص بيحب نفسه… الموضوع أعمق من كده.
في فرق كبير بين إن الإنسان يكون واثق من نفسه، بيحب شكله، بينجح وبيحب يقدّر نفسه، وبين إن تقديره لذاته يكون قائم بشكل أساسي على إعجاب الآخرين بيه واحتياجه المستمر إنه يحس إنه أفضل أو مميز.
علميًا، النرجسية ممكن تظهر كـ سمات شخصية بدرجات مختلفة، لكن اضطراب الشخصية النرجسية تشخيص نفسي له معايير محددة، ومش كل شخص أناني أو مؤذي أو متحكم ينفع نقول عليه “نرجسي”.
واللي بيهمني هنا أكتر هو تأثير السلوك على العلاقة.
لأنك ممكن تلاقي نفسك مع شخص في البداية بيدي اهتمام كبير جدًا، يسمعك، يمدحك، ويخليكي حاسة إنك مختلفة عن كل الناس…
وبعد ما العلاقة تستقر، تبدأ حاجات تانية تظهر.
أي نقد بسيط يتحول لمشكلة.
احتياجاتك تصبح “ضغط”.
مشاعرك يتم التقليل منها.
والخطأ غالبًا لازم يكون عندك إنتِ.
ومع الوقت، ممكن يحصل شيء أخطر…
تبدأي تشكي في نفسك.
“يمكن أنا حساسة زيادة؟”
“يمكن أنا اللي مكبرة الموضوع؟”
“يمكن لو اتعاملت بطريقة مختلفة هو يتغير؟”
وده في علم النفس مرتبط أحيانًا بما يسمى التشكيك في الإدراك أو Gaslighting، وهو نمط من التلاعب يجعل الشخص يشك في ذاكرته أو مشاعره أو تفسيره للأحداث.
وعشان كده أنا دايمًا بقول:
متشغليش نفسك بسؤال: هو نرجسي ولا لأ؟
اسألي سؤال أهم:
أنا بعيش إيه داخل العلاقة دي؟
هل أقدر أتكلم من غير خوف؟
هل مشاعري مسموعة؟
هل أقدر أقول “لا”؟
هل فيه احترام للحدود؟
هل الطرف الآخر قادر يعترف بخطئه ويصلحه؟
ولا أنا طول الوقت بحاول أثبت إني كويسة، وأبرر، وأعتذر، وأخاف أخسر العلاقة؟
لأن الهدف مش إننا نوزع تشخيصات على الناس…
الهدف إننا نفهم السلوك، ونفهم تأثيره علينا، ونعرف نحط حدود تحمينا.
وأحيانًا أول خطوة في التعافي مش إنك تعرفي هو كان إيه…
أول خطوة إنك تعرفي إنتِ كنتِ إيه وأصبحتِ إيه بعد العلاقة دي.
لأن العلاقة الصحية مش المفروض تخليكي طول الوقت في حالة دفاع عن نفسك.
كوتش رحاب زكريا
لايف كوتش ICF
مستشار أسري وزواجي ونفسي
ممارس علم إيجابي
