بقلم المواطن: عبده أحمد حسانين النائب اللي ما بيحسش بالأسعار..ما يستاهلش الكرسي

…النائب اللي ما بيحسش بالأسعار..ما يستاهلش الكرس…
………..نواب بلا صوت…شعب بلا بروتين……….
بقلم المواطن: عبده أحمد حساني
الواقع بيقول إن المواطن بقى بيمشي في السوق مش علشان يشتري علشان يتفرج ويحسب ويروح
بيبص على الأسعار ويقول:نا هاكل إيه بكرة؟
لما نوصل لمرحلة إن الأب يفكر 100 مرة قبل ما يشتري فرخة لعياله يبقى في حاجة غلط والغلط الأكبر إن اللي مفروض يتكلم عننا ساكت اللي معاه حصانة ومعاه ميكروفون ومعاه سلطة رقابية.. سايبنا نواجه السوق لوحدنا
فاتورة المواطن.. بالأرقام اللي توجع
تعالوا نحسبها بالورقة والقلم زي أي بيت مصري بيعمل ميزانية آخر الشهر:
– كيلو اللحمة وصل450 جنيه يعني الأسرة اللي فيها 4 أفراد لو كلت لحمة مرة في الأسبوع عايزة 1800 جنيه لحمة بسوي الشهر
– البانيه بـ 275 جنيه يعني سندوتش المدرسة بقى رفاهية
– البيضة بـ 5 جنيه. يعني لو كل طفل خد بيضة الصبح الأسرة بتصرف 20 جنيه بيض يوميًا 600 جنيه في الشهر.
– السمك؟ أقل كيلو بـ 130 جنيه يعني حتى أكلة الغلابة”بقت حلم النتيجة: الفقير شطب البروتين من الأكل العيال بتكبر من غير كالسيوم والأنيميا بقت مرض شعبي
– التفاح بـ 70 جنيه العنب بـ 50 جنيه
– الجوافة اللي كنا بنقول عليها فاكهة الغلابة بـ 25 جنيه
يعني الأم اللي عايزة تجيب كيلو فاكهة لعيالها تدفع 100 جنيه فقررت تلغيها الفيتامينات بقت رفاهية
– البطاطس بـ 25 جنيه- الخيار بـ 15 جنيه
– الطماطم وصلت 55 جنيه. أيوه كيلو الطماطم بقى أغلى من مرتب ساعة شغل
يعني طبق السلطة اللي كان على كل سفرة بقى محتاج ميزانية الفقير لغى الخضار
– كيلو اللبن بـ 43 جنيه- كيلو الجبنة القريش بـ 80 جنيه
– علبة الزبادي بـ 10 جنيه
الأم اللي كانت بتدي ابنها كوباية لبن قبل النوم بقت تحسبها الزبادي اللي كنا بنقول عليه أرخص عشا بقى بـ 15 جنيه
طيب سؤال بسيط لكل نائب ولكل مسؤول: المواطن ياكل إيه؟
ياكل طوب؟ يشرب مياه ويحمد ربنا؟
فين النواب؟ فين الشيوخ؟
السؤال اللي بيلف في كل بيت: هو النواب دول عايشين معانا؟ بيشتروا من نفس السوق؟”
لأن لو بيشتروامستحيل يسكتوا
المفاجأة إن أغلب النواب محدش منهم طلع في فيديو ولا عمل بث مباشر وقال: يا جماعة الأسعار دي حرام المواطن هيجيب منين؟محدش طلع قال للحكومة: أنتم فين من اللي بيحصل؟
محدش استخدم سلطته الرقابية وقال: هنستجوب وزير التموين_ هنستجوب وزير الزراعة
كل اللي بنشوفه: – بيانات
– جوابات إحاطة مرمية في الأدراج وما اتنفذتش
– صور في اجتماعات مكتوب عليها ناقشنا قضايا المواطن طيب ناقشتوا إيه؟ والمواطن استفاد إيه؟
وبعد 10 أيام هتلاقي نفس النواب طالعين يقولوا: كل سنة وأنتم طيبين في المناسبات
يا سيدي المواطن مش عايزتهنئة عايزيعرف هيتعشى إيه النهاردة
النائب ماله ومال الأسعار.. أكذوبة لازم تنتهي
فيه ناس بتطلع تدافع وتقول: يا جماعة النائب مش بتاع أسعار دي شغلة الحكومة. الكلام ده غلط 100%
النائب هو رقيب على الحكومة هو اللي معاه أدوات: سؤال_ استجواب_ طلب إحاطة_لجنة تقصي حقائق
النائب هو اللي يقدر يوقف وزير ويقوله: فين خطة ضبط السوق؟
النائب هو اللي يقدر يفضح الاحتكار ويتكلم عن جشع التجار_ ويطلب حماية المستهلك تنزل الشارع
الحصانة اللي معاك دي مش وجاهة اجتماعيةدي سلاح تدافع بيه عن الناس اللي انتخبتك
لو مش هتستخدمها علشان رغيف العيش هتستخدمها في إيه؟
فيه نواب محترمين بيتكلموا صوتهم عالي في المجلس بيحاربوا
دول على راسنا
لكن الأغلبية ساكتة.والساكت عن الحق شيطان أخرس ما بالك بالساكت عن الجوع المواطن هو اللي عملك.. مش العكس
لازم كل نائب يحط الجملة دي حلقة في ودنه:
المواطن مش بيتطفل عليك لما يطلب حقه.. أنت اللي بتاخد مرتبك من ضرايبه
المواطن هو اللي وقف في طابور الانتخابات وهو اللي اداك الحصانة وهو اللي خلاك “سيادة النائب”
خدمتك ليه مش فضل منك دي وظيفتك واجبك عقد بينك وبينه
لما المواطن يجوع يبقى أنت فشلت في وظيفتك
لما المواطن يلغي اللحمة والفاكهة واللبن من بيته يبقى بياناتك وجواباتك مالهاش لازمة
المواطن هو أساس البلد. من غيره مفيش دولة مفيش اقتصاد مفيش مجلس فاحترمه وحس بيه واتكلم بلسانه
احنا بنوثق.. علشان الانتخابات الجاية*
المواطن مبقاش ساذج بقى يوثق يصور يكتب يحفظ
كل نائب سكت متسجل
كل نائب اتكلم متسجل
كل نائب نزل السوق وسأل الناس متسجل
وكل نائب قاعد في مكتبه المكيف وبينزل بيانات برضه متسجل
الانتخابات الجاية مش هتبقى زي اللي فاتت
الناس هتفتح الدفاتر وتشوف: مين وقف معانا لما كيلو الطماطم بقى بـ 55 جنيه؟
مين دخل المجلس اتخانق علشانا؟ ومين دخل يتصور؟
التاريخ مش بينسى والسوشيال ميديا مش بتنسى والجوع مش بيتنسي
خطوات لازم يعملها كل نائب دايرة فورًا
الكلام شبعنا منه عايزين فعل ودي 7 خطوات أي نائب محترم يقدر يعملها من بكرة
انزل السوق بنفسك: سيب المكتب والكاميرات وانزل السوق في دايرتك اسأل الست اللي بتشتري اسأل الراجل الغلبان صور فيديو وأنت بتسمع شكوتهم مش وأنت بتخطب فيهم
2طلب إحاطة عاجل: قدم طلب إحاطة لوزير التموين ووزير الزراعة عن أسباب انفلات الأسعار وصمم تناقشه تحت القبة مش في الدرج
3لجنة شعبية لمراقبة الأسعار: كون لجنة من شباب دايرتك تنزل تراقب الأسواق وتبلغ عن أي تاجر جشع وبلغ التموين قدام الناس
4معارض أهلاً رمضان طول السنة: اضغط على المحافظة تعمل شوادر بيع بسعر الجملة في كل قرية مش معرض واحد في المركز والتصوير عليه
5واجه الاحتكار بالاسم: لو فيه تاجر محتكر سلعة في دايرتك اطلع قول اسمه. الحصانة تحميك الناس هتقف في ضهرك
6اقتراح بقانون: قدم اقتراح بقانون يغلظ عقوبة احتكار السلع الغذائية خلي الحبس وجوبي والغرامة ملايين
7كشف حساب شهري: اطلع كل شهر في بث مباشر قول لأهل دايرتك: أنا عملت 1 و2 و3 علشان الأسعار ولو معملتش قول معملتش ليه الشفافية مش عيب
الأسعار مش أرقام في نشرة اقتصادية الأسعار يعني عيل بينام من غير عشا يعني أم بتقسم البيضة على اتنين
يعني أب بيدور وشه وهو معدي من قدام محل الفاكهة علشان ما يتحرجش قدام ابنه
يا سيادة النائب يا سيادة العضو:
الكرسي اللي أنت قاعد عليه تمنه مدفوع من عرق الناس دي
فلو مش هتحس بيهم قوم من عليه
احنا مش بنشحت احنا بنطلب حقنا
حقنا في العيش_ والحرية_ والعدالة الاجتماعية
وأول العدالة إن المواطن يلاقي أكل على ترابيزة بيته
وبلاش بيانات. انزلوا الشارع
التاريخ بيكتب والناس بتسجل والانتخابات الجاية هتفرز
ومحدش هيضحك على حد تاني
مجلس الشيوخ.. فين دوركم في معركة العيش؟
الناس كلها بتتكلم عن النواب بس محدش بيجيب سيرة مجلس الشيوخ مع إن دوره دراسة القوانين واقتراح ما يراه كفيلاً بدعم مقومات الدولة
يعني المفروض إن الشيوخ هم بيت الخبرة اللي يقدموا حلول استراتيجية للأزمات وأولها أزمة الأسعار
فين دراساتكم عن سلاسل الإمداد؟
فين توصياتكم للحكومة عن دعم صغار الفلاحين بدل ما يتسلموا للتجار؟
فين مقترحاتكم لضبط سوق الأعلاف اللي مخلي كيلو الفراخ والبيض ولع؟
للأسف، أغلب الناس ما تعرفش أسامي شيوخ دايرتها. لأنهم غايبين عن المشهد
المجلس ده اتعمل علشان يبقى صوت العقل مش علشان يبقى استراحة من المعاش
لو المواطن بيصرخ من الأسعار يبقى بيت الخبرة” لازم يلاقي حلول مش يقعد يتفرج
محدش بيقول إن النائب هو اللي بيسعر دي شغلة الحكومة وأجهزتها
لكن النائب هو اللي ماسك العصاية من النص: يراقب الحكومة ويحمي المواطن من جشع التجار
لما تسيب السوق للعرض والطلب من غير رقابة يبقى أنت بتسلم المواطن تسليم أهالي للمحتكرين
تراقب مباحث التموين: بتنزل ولا قاعدة في المكاتب؟ المحاضر بتتعمل ولا بتتقطع بالتليفون؟
تحاسب التنفيذيين: المحافظ_ مدير التموين_ مدير الزراعة في دايرتك استدعيهم في المجلس واسألهم قدام الناس: عملتوا إيه؟
النائب الشاطر هو اللي يخلي مدير التموين يخاف يسيب مكتبه لأنه عارف إن فيه عين بتراقبه
فـ يا سيادة النائب سكوتك مش حياد سكوتك مشاركة في كسرة النفس دي.
لأنك قادر تتكلم _وقادر تضغط _وقادر تغير_ بس اخترت الصمت
يا كل نائب ويا كل شيخ:
الكرسي دوار_ والحصانة مش دايمة_ والدورة هتخلص
اللي هيتبقالك هو سيرتك_الناس هتقول: ده اللي كان بيحارب علشاناولا ده اللي كان سايبنا نغرق في الأسعار
انزل_ اتكلم_ واجه_اضغط_راقب_حاسب
استخدم كل أداة الدستور ادهالك
أنت مش موظف_ أنت نائب عن أمة
ولو خايف على زعل مسؤول أو تاجر كبير افتكر زعل الأب اللي مش عارف يعشي عياله
افتكر كسرة الأم وهي بتقول لابنها (مفيش)
افتكر إن الجوع كافر وإن التاريخ لا يرحم اللي باع ضميره
احنا كمواطنين هنفضل نراقب ونوثق ونكتب
علشان لما تيجي الانتخابات الجاية يبقى كل واحد معروف تمامه
مين اللي كان سند_ومين اللي كان عبء
الجوع مش وجهة نظر والسكوت عليه خيانة
والمواطن مش هينسى مين وقف معاه_ ومين باعه
#صوت_العقل_إرادة_الغد
#النائب_عبده_احمدحسانين
#لاتفقدالامل_مادمت_حيأ