…..احترام الجلابية الصعيدي احترام للصعيد كل…..
………….من يمنع الجلابية يمنع الهوية……………
بقلم النائب:عبده أحمد حسانين
في مشهد اتكرر أكتر من مرة راجل صعيدي راح سينما راح مصلحة حكومية راح مكان ثقافي لابس جلابيته الصعيدي فاتقاله: “معلش الدخول بالجلابية ممنوع”
نفس الراجل لو كان لابس بنطلون مقطع أو شورت كان دخل عادي
لكن الجلابية اللي لبسها أبوه وجده. اللي فيها شموخ الصعيد وتاريخه اتعاملت كأنها عيب
المشهد ده مش هزار ده جرس إنذار بيقول إن عندنا خلل في نظرتنا للهوية وللتراث وللاحترام
الجلابية الصعيدي مش “زي شعبي” بنتصور بيه للترند دي زي قومي زي رسمي غير معلن لأهل الصعيد زي ما الكيلت زي رسمي للاسكتلندي والكيمونو للياباني
ولما تبقى وزارة الثقافة نفسها مكان بيتقال فيه ممنوع الجلابية يبقى لازم نقف ونقول: كفاية
الجلابية الصعيدي مش قماش.. دي تاريخ
الجلابية الصعيدي اتولدت من البيئة من الجو من حياة الفلاح والصعيدي
قماش قطن خفيف يستحمل حر الصيف واسعة علشان الحركة في الغيط وطويلة علشان الوقار
لونها أبيض أو كحلي أو سادة علشان النضافة والهيبة
بس القصة مش في القماش القصة في اللي لابسها
الصعيدي لما بيلبس الجلابية بيلبس معاها كرامته_ وأصله_ وكلمته اللي ما بتنزلش الأرض
الجلابية دي لبسها جدك وانت بتقعد في المندرة ولبسها عمك وهو بيفض مشكلة ولبسها أبوك وهو راجع من الغيط وعرقه شاهد عليه
يبقى لما تيجي تقول لصعيدي اقلع الجلابية علشان تدخل انت مش بتكلمه على اللبس انت بتقوله سيب هويتك بره وادخل بشخصية تانية ده مش تنظيم. ده إهانة
اللي حصل في بعض دور السينما وفي مراكز ثقافية تابعة لوزارة الثقافة إن أمن المكان رفض دخول مواطن صعيدي بالجلابية
والحجة: دي تعليمات.. المكان له زي معين
طيب نسأل سؤال بسيط
هل الجلابية الصعيدي لبس غير لائق؟
هل فيها خادش للحياء؟
هل فيها إساءة للمكان؟
الإجابة: لأ
الجلابية زي محترم ساتر_نظيف_ ومش مخالف لأي قانون
يبقى المنع ده على أي أساس؟ على أساس الشكل مش عاجبنا؟
على أساس إننا لسه عايشين بعقلية إن الفلاح_والصعيدي درجة تانية؟
المشكلة الأكبر إن ده بيحصل في أماكن مفروض إنها بتاعت ثقافة
وزارة الثقافة اللي مفروض تحافظ على التراث هي اللي بتطرده من على الباب
يبقى بنحافظ على التراث في المتحف ونمنعه في الشارع؟
دي ازدواجية ما تنفعش
الموضوع مش فردي ده تراكم بيبني إحساس عند الصعيدي إنه غريب في بلده
وإحساس الغربة ده أخطر من أي أزمة اقتصادية
الترند.. أكبر إهانة للجلابية
في المقابل تلاقي شاب بلوجر يلبس جلابية صعيدي يعمل رقصة يقول كلمتين بالصعيدي ويكتب ترند الصعيد
يجمع ملايين المشاهدات ويبيع منتجات ويطلع تريند يومين ويختفي
وهنا المشكلة مش في الشهرة المشكلة في الاستخدام
لما تلبس الجلابية علشان تضحك الناس عليك علشان تعمل كوميديا ساذجة علشان تاخد لايك يبقى انت بتحول الرمز لهزلية
الجلابية الصعيدي ليها هيبة الهيبة دي اتبنت عبر سنين من المواقف من الرجولة من الكرم من الشهامة
فما ينفعش تبقى زي تنكري في عيد ميلاد
الفرق بسيط
الصعيدي بيلبس الجلابية علشان هو صعيدي
وغير الصعيدي بيلبسها علشان يعمل فيديو
الأول احترام والتاني استهلاك
وإحنا كصعايدة لازم نفرق ونقول: أهلاً باللي يحترم تراثنا لكن اللي بيستظرف على حسابه، مش مننا
وزارة الثقافة.. دورها الحماية مش المنع
وزارة الثقافة مش بس معنية بالمسرح والأوبرا
هي معنية بالثقافة الشعبية بالزي.باللهجة بالعادات
يعني الجلابية الصعيدي المفروض تبقى في أولوياتها مش على قائمة الممنوعات
المطلوب بسيط:
قرار واضح الجلابية الصعيدي زي رسمي محترم والدخول بيها لأي منشأة ثقافية حق
الأمن مش هيحمي التراث لو ما اتعلمش إن التراث مش خطر
مهرجانات للزي الصعيدي معارض عروض أزياء تراثية خلي الشاب الصعيدي يفتخر وهو لابسها في القاهرة مش يستخبي
أي حد يستخدم الزي للسخرية في الإعلام أو السوشيال ميديا لازم يبقى فيه رد من الوزارة يحمي الرمز
لو وزارة الثقافة ما عملتش كده يبقى مين هيعمل؟
التراث مش هيحمي نفسه
خلينا نعترف: جزء كبير من الأزمة سببه الدراما
السينما والتليفزيون صوروا الصعيدي 40 سنة إنه إما مجرم بثأر أو أهبل بيضحك أو خادم عند الباشا
ولبسه؟ جلابية متوسخة وعمامة مايلة وكلام مكسر
الصورة دي ثبتت في عقل الناس
فبقى طبيعي لما تشوف صعيدي بجلابية عقلك يصنفه درجة تانية
وده ظلم
الصعيد طلع منه علماء_ وزراء_ فنانين_ ضباط_تجار_فلاحين شرفاء
الصعيد هو اللي حمى مصر في 56_وفي 67_وفي 2011_ وفي 2013
الصعيد هو اللي بيأكل مصر قمح وقصب وطماطم
يبقى الإعلام عليه واجب يصحح الصورة
يجيب الصعيدي دكتور_ مهندس_ ضابط_ لابس جلابيته وبيفتخر بيها كده بس هنكسر الصورة النمطية
مفيش حد هيحترم تراثك لو انت ما احترمتوش
أنا كصعيدي لما أروح القاهرة لازم أروح وأنا راسي مرفوعة بجلابيتي مش مستخبي في بنطلون علشان ما حدش يتريق
لما ابني يسألني ليه بنلبس جلابية أقوله: دي لبس رجالتك_ودي تاريخك_ودي هويتك
الاحترام مش هيجي من قرار وزير هيجي من موقف كل واحد فينا
لما الأمن يقولك ممنوع قوله : ده زي رسمي وده حقي
لما صاحبك يتريق فهمه إنك بتفتخر
الجيل الجديد محتاج يشوفنا متمسكين علشان يتمسك
الدولة اللي عايزة تبني جمهورية جديدة لازم تبنيها على هوية الناس
مش معقول نهدم الهوية بحجة الموضة والتنظيم
الصعيد مش جزء من مصر الصعيد هو مصر
تاريخه_ لهجته_ زيه_ عاداته_دي كلها مكونات الهوية المصرية
يبقى أي منع للجلابية الصعيدي في مكان عام هو منع لهوية مصرية
وده مرفوض شكلاً وموضوعاً
يجب على اعضاء مجلس النواب من صعيد مصر تقديم طلب إحاطة في المجلس لوزارة الثقافة،وهسأل:
إيه لائحة الزي الممنوع في دور الثقافة؟
ومين اللي قرر إن الجلابية الصعيدي مش لائقة؟
وهل فيه تعليمات بمنع أي زي تراثي مصري؟
الجلابية الصعيدي مش موضة هتروح وتيجي
دي تاج فوق راس كل صعيدي
واللي يقلع تاجه يبقى عريان قدام نفسه قبل الناس
أنا مش بقول إن كل الناس لازم تلبس جلابيةلأ
البس اللي يريحك
بس ما تمنعش غيرك يلبس اللي يفتخر بيه
وما تسمحش لحد يسخر من رمزك
الصعيدي طول عمره شامخ
والشموخ ده له علامات
منها الكلمة_ ومنها الموقف_ ومنها الجلابية
خلي ولادنا يشوفونا لابسينها واحنا داخلين الجامعة_ والوزارة_ والسينما_ والمؤتمر
علشان يعرفوا إن التراث مش عيب_ وإن الأصل مش بيتقلع
واللي ما لوش قديم_ما لوش جديد
#صوت_العقل_إرادة_الغد
#النائب_عبده_احمدحسانين
