بقلم النائب عبده أحمد حسانين سوهاج تتكلم.. والدولة لازم تسمع .. وتفحص وتحاسب

…سوهاج تتكلم.. والدولة لازم تسمع .. وتفحص وتحاس…

…سوهاج تحتاج إجابة واحدة حاسمة ( فساد) أو شائعة؟…

• بقلم النائب عبده أحمد حساني

في الأيام اللي فاتت كلنا شوفنا الساحة الإلكترونية في محافظة سوهاج بتغلي بوستات، فيديوهات شكاوى مستندات بتتقال إنها تخص وقائع فساد ومخالفات في مصالح وجهات حكومية

والكلام مش محبوس في صفحات مجهولة بقى حديث القهاوي حديث المواصلات حديث البيوت الناس بتسأل بعض: شوفت اللي اتنشر عن المصلحة الفلانية؟ صحيح ولا كلام؟

الظاهرة دي مش جديدة على مصر كلها بس الجديد إن سرعتها بقت مخيفة وتأثيرها بقى مباشر على ثقة الناس في الدولة وعلى سمعة الموظف الشريف قبل الفاسد وعلى هيبة المؤسسات

وأنا هنا مش جاي أدافع عن حد ولا أتهم حد أنا جاي أقول إن الموقف ده لازم يتقاس بميزان الدهب لأننا قدام معادلة خطيرة

لو سكتنا على كلام كاذب هنضيع سمعة مؤسسات ونشك الناس في كل حاجة

ولو سكتنا على فساد حقي هنبقى شركاء في الجريمة وهنكسر ثقة المواطن في الدولة

علشان كده اللي بيحصل في سوهاج دلوقتي مش ترندوهيعدي ده اختبار حقي لقدرة الدولة على السماع الفحص والمحاسبة

السوشيال ميديا بقت ساحة رقابة شعبية.. شئنا أم أبينا

زمان كان المواطن لو عنده شكوى بيروح مكتب النائب أو يكتب شكوى في المحافظة وبتفضل محبوسة في الدرج شهور

النهارده بموبايل بسيط يقدر يصور_ يكتب _ينشر_ويوصل صوته لملايين في ساعات

دي حاجة ليها وجهين الوجه الأول إيجابي:

السوشيال ميديا كسرت احتكار المعلومة بقت عين المواطن مفتوحة على أي تجاوز وبقت ضغط شعبي حقي بيجبر أي مسؤول إنه يرد ويوضح ويتحرك

كم قضية فساد اتكشفت بسبب فيديو مدته دقيقة؟ كم مسؤول اتحاسب لأنه افتكر إن محدش شايفه؟

ده اسمه الرقابة المجتمعية ودولة القانون الصح بترحب بيها لأنها بتكمل دور الرقابة الرسمية

الوجه الثاني خطير

نفس الأداة اللي بتكشف الفساد ممكن تظلم بريء وتدمر سمعة مؤسسة شغالة بضمير وتنشر شائعة تقلب الدنيا

والمشكلة إن الكذبة بتسافر أسرع من الحقيقة الناس بتتفاعل مع العنوان الصادم ومحدش بيستنى النتيجة

فبتلاقي موظف شريف اتشوهت سمعته ومدير ناجح اتكسرت هيبته ومصلحة بتخدم 100 ألف مواطن اتفقدت الثقة فيها لمجرد بوست مش متوثق

يبقى احنا قدام واقع جديد: سلطة الرأي العام الإلكتروني موجودة ومش هتختفي

والسؤال مش نمنعها إزاي؟ لأن ده مستحيل ومش مطلوب

السؤال هو: نظم التعامل معاها إزاي علشان نستفيد من الإيجابي ونقفل على السلبي

قاعدة ذهبية.. لا تصدق كل شيء، ولا تكذب كل شيء

أي قضية بتتطرح على السوشيال ميديا لازم تتقاس على مسطرتين

المسطرة الأولى: مسطرة الحقيقة

هل الكلام ده ليه مستند؟ هل فيه دليل؟ هل اللي ناشر عنده صفة ومصلحة مباشرة ولا بيردد كلام سمعه؟

لو الإجابة لا يبقى لازم نقول للرأي العام: الكلام ده غير مثبت حتى الآن وهنفحصه

السكوت هنا بيخلي الناس تفتكر إن الدولة بتتستر

المسطرة الثانية: مسطرة الأثر

هل القضية دي بتمس المال العام؟ هل بتمس صحة الناس؟ هل بتمس حقوق مواطنين غلابة؟

لو الإجابة أيوه يبقى حتى لو الدليل ضعيف لازم يتحرك جهاز رقابي يفحص

لأن في قضايا مينفعش نستنى لما الدليل يبقى 100%. يكفي شبهة قوية علشان نفتح تحقيق

القاعدة دي بتحمي حاجتين:

بتحمي المؤسسات من الشائعات

وبتحمي المواطن من الفساد

وأي خروج عن القاعدة دي يا إما تستر يا إما فوضى

دور الدولة مش النفي ولا التكذيب.. دورها التحقيق

أكبر غلطة ممكن تقع فيها أي جهة حكومية دلوقتي هي إنها تطلع بيان تقول فيه الكلام ده كذب وافتراءوتسكت

المواطن بقى أذكى من كده هو عايز يشوف إجراء مش كلام.

الدولة القوية هي اللي بتقول:

سمعنا_أيوه_ شوفنا البوستات اللي بتتتكلم عن الجهة الفلانية

فحصناأحلنا الموضوع للجهة الرقابية المختصة الرقابة الإدارية_ النيابة الإدارية_الجهاز المركزي للمحاسبات

هنعلن النتيجةهنطلع للرأي العام ونقول: فحصنا لقينا كذا وبناء عليه عملنا كذا

الشفافية دي مش ضعف دي قوة

لأنها بتقول للمواطن: إنت مش لوحدك_ وفيه دولة بتشتغل

وعلى العكس لو ثبت إن الوقائع صحيحة يبقى لازم يكون فيه محاسبة سريعة حاسمة_ومعلنة

مفيش حاجة اسمها هننقل الموظف لمكان تاني وخلاص

المال العام مش لعبة وحقوق الناس مش هزار

لما المواطن يشوف مدير فاسد اتشال واتحول للنيابة هيصدق إن فيه دولة

ولما يشوف موظف شريف اتظلم واتردله اعتباره هيصدق إن فيه عدل

أي بوست بينتشر عن جهة حكومية هو إنذار مبكر

يا إما الإنذار ده حقي.فتلحق تصلح الغلط قبل ما يكبر

يا إما الإنذار ده كاذب فتطلع ترد وتوضح وتقفل الباب

لكن السكوت هو أسوأ اختيار

السكوت بيخلي الشائعة تكبر وبيخلي الناس تصدقها وبيخلي الموظف الشريف يحبط ويقول: أنا بشتغل ليه؟

المؤسسة المحترمة لازم يكون عندها وحدة رصد وتواصل

وحدة تتابع إيه اللي بيتقال وترد بسرعة بالمعلومة الصح وتفتح باب للشكوى الرسمية

المواطن مش عدو المواطن صاحب حق

ولو جه يقولك فيه غلط هنا قوله تعالى ورينا ولو غلطان هنحاسب ولو إنت غلطان هنوضحلك

رسالة للمواطن.. حقك تقول وواجبك تتأكد

أنا عارف إن الغضب عند الناس كبير وعارف إن ناس كتير اتلسعت من فساد أو إهمال فبقت أول ما تشوف بوست تصدق

حقك إنك تتكلم وتشتكي وتفضح أي فساد ده حقك الدستوري

لكن واجبك إنك تتأكد قبل ما تشير لأنك ممكن ببوست واحد تظلم أب عنده عيال وتقطع عيشه وتدمر سمعته

لو عندك مستند روح بيه للنيابة أو الرقابة الإدارية

لو معندكش متشيرش كلام مرسل

اكتب شكوى اطلب معلومة استخدم حقك في قانون حرية تداول المعلومات

المعركة ضد الفساد مش معركة لايكات دي معركة أدلة ومستندات ومحاسبة

ماذا نريد من أجهزة سوهاج الآن

اللي بيحصل في سوهاج دلوقتي بيطلب 3 حاجات واضحة

تشكيل لجنة فحص عاجلة

محافظ سوهاج بالتنسيق مع الرقابة الإدارية يشكل لجنة من مستقلين تفحص كل الوقائع اللي اتنشرت في آخر 15 يوم

مش عايزين فحص شكلي عايزين فحص حقي بجدول زمني والنتيجة تتعلن

حماية المبلغين والشهود

أي موظف عنده معلومة وخايف يتكلم لازم يطمن إن القانون هيحميه

لأن الفساد بيتغذى على الخوف

خط ساخن للشكاوى الموثقة

المحافظة تفتح رقم وواتساب رسمي لاستقبال شكاوى الفساد مع التزام بالرد خلال 72 ساعة

الناس عايزة تحس إن فيه باب مفتوح مش قافلينه عليهم

الخطوات دي مش رفاهية دي ضرورة علشان نرجع الثقة

هيبة الدولة مش بالكلام.. هيبة الدولة بالمحاسبة

هيبة الدولة مش إن محدش يتكلم عنها

هيبة الدولة إن أي حد يغلط أياً كان مين يتحاسب

الدول القوية مش اللي مفيهاش فساد مفيش دولة في العالم مفيهاش فساد

الدول القوية هي اللي بتكشف الفساد وتحاسب علي وتنشر النتيجة

لما المواطن السوهاجي يشوف إن بوست اتنشر ووراه تحقيق ووراه نتيجة هيقول: أيوه فيه دولة

ولما يشوف إن الموضوع اتسكت عليه هيقول: كله محصل بعضه

احنا بنبني جمهورية جديدة والجمهورية الجديدة مش هتتبني بأسمنت وحديد بس

هتتبني بثقة الناس في إن القانون ماشي على الكل

الثقة لا تُمنح.. الثقة تُكتسب

ثقة المواطن في الدولة مش شيك على بياض

الثقة دي بتتبني كل يوم بموقف بإجراء بقرار

اللي بيحصل على السوشيال ميديا في سوهاج دلوقتي هو فرصة

فرصة للدولة تثبت إنها بتسمع

وفرصة للمواطن يثبت إنه شريك في بناء البلد مش متفرج

لأن سوهاج تستاهل إدارة نضيفة

ولأن المواطن السوهاجي يستاهل إنه يحس إن حقه محفوظ وفلوسه مصانة وصوته مسموع

واللي غلط يتحاسب واللي اتظلم يتردله اعتباره واللي شريف نرفع راسه

#صوت_العقل_إرادة_الغد

#النائب_عبده_احمدحسانين