اروع قصيدة وطنية في حب مصر كلمات الشاعر محمد عبدالفتاح وهوا شاعر شاب من مدينة بلطيم بمحافظة كفر الشيخ تميز بعمق احساسه وذكائه العاطفي الذي ينعكس دائما علي كتاباته وله ثلاث مؤلفات ناجحه : كتاب حكاية حزن و كتاب قررت اعيش و كتاب البطل .
كلمات القصيدة:
زمان اختارتها بكيفي……..وبكرة وبعده هاختارها…
وهاخسر دنيتي بحالها………ومصر لا يمكن أخسرها…
ولو نامت هاصحيها…………ولو نسيت هافكرها…
وأعيش فيها وبرضو أحسد……..عليها كل من زارها…
يدوسوا عليها بالرجلين…
بدمع العين أطَهَّرها…
بدقة قلبي أرقيها…
بأنفاسي أعطرها…
تقيد النار في شرياني…
بشرياني أبخرها…
وأخلي اسمها تعويذة…
ليل ونهار أكررها…
وأغنيها. وأمثلها…
وهاكتبها. وأصورها…
وأعيش فيها وبرضو أحسد…
عليها كل من زارها…
وهَزرع ع الطريق دمي…
عشان ينده لأحرارها…
واشرفها ببطولاتي
اذا غيري صبح عارها
وهانسى تاري عند الناس…
لكن ما أقدرش أسيب تارها…
ده بيها حلمت أحلامي…
وبيها عرفت أفَسَّرها…
هاسيب جنات بلاد الله…
وأخش برغبتي نارها…
وأحَوِّش فرحها ليها…
وأخبي في قلبي أسرارها…
عاشقها بكل ما فيها…
بحنضلها وسُكَّرها…
أنا الأخرس هاغنيلها…
وأنا المسجون هاحررها…
وأنا المشلول هاسَنِّدها…
وأنا الأعمى هانَوَّرها…
