الكرة المصرية…الي أين؟!!!!!!!
احنا فين دلوقتي
احنا بنعيش على الماضي.. مش بنبني المستقبل
احنا عايشين على الذكريات.. عايشين على الوهم!
كل إنجاز بنفتكرُه بقى من الماضي، مفيش جديد، مفيش خطوة لقدّام.
بنعيش على 3 بطولات أمم إفريقيا حققها أقوى جيل في تاريخ الكورة المصرية،
وعلى إنجاز شوقي غريب مع منتخب الشباب 2001 لما حقق المركز التالت وبرونزية كأس عالم،
وعلى هدف مجدي عبدالغني اللي قعدب 30 سنة بيزلّنا بيه كأنه حقق كاس العالم
نفسي حد يجاوبني فين التخطيط؟ فين التطوير؟
فين المنظومة اللي تبني جيل جديد يكمل المسيرة دي؟
عندنا اتحاد كورة فاسد، منظومة فاشلة مافيهاش لا تنظيم ولا رؤية،
مفيش خطة طويلة المدى، مفيش حلم حقيقي لمستقبل الكورة في مصر.
كل اللي شاغلهم الفلوس والسبوبة..
أما مصلحة البلد؟ فمش ضمن أولوياتهم أصلًا
انزل الشوارع والحواري والمدن والقرى والنجوع في الصعيد وشوف بعينك،
هتلاقي مواهب تقدر تجبلك كاس عالم مش لاعيبه كل طموحها الوصول لكأس العالم والتمثيل المشرف
بس المواهب دي محدش شايفها ليه؟
عشان في بلدنا الكورة بقت بتتورث
مش مهم تكون موهوب
المهم تكون ابن مين أو أمك حلوة أو معاك فلوس أو أبوك ليه منصب
الموهبة بقت آخر حاجة بتتسأل عنها
تتفرج على ماتش في دورة رمضانية،
تحس إنك فاتح بي إن سبورت على ماتش في دوري أبطال أوروبا تيجي تتفرج ع ماتش ف الدوري تحس ان عيلة ابوك مشلحين الجلابيه وهاتك يادعك عشان النخلتين الورث
تيجي تبص على الأكاديميات وقطاع الناشئين ف الانديه اللي المفروض تخرج نجوم
تكتشف إنها بقت تجارة مش صناعة
سواء في الأهلي أو في الزمالك او في أي نادي في مصر
لو دفعت هتلعب مش هتدفع انسى حتى لو كنت ميسي وكريستيانو ونيمار وأعظم لاعبين التاريخ كلهم اتجمعوا فيك مش هتقبل وهتروح مكسور الخاطر وتكره الدنيا كلها
حسبي الله ونعم الوكيل في كل مسؤول عن الرياضة في البلد دي
وصلونا إننا نبقى شعب عايش على الماضي بدل ما نصنع المستقبل بنتفرج بس ع الطفرات والانجازات اللي بتحصل حوالينه
كفاية فشل.. كفاية فساد.. كفاية وجع!
احنا نستحق أحسن من كده بكتير.
