كتب / محمود دياب
في حاجة غالية كدة إسمها الأصول، تقابل حد تقول ده متربي علي الأصول،الأصول جوهرها رقي وأدب، الأصول بتعمل أصحاب وكمان بتخليك تخسر ناس،الأصول لو اتربيت عليها بتخليك شخص حساس جداً بتركز إنت بتحط رجلك فين علشان متدوسش على حد في طريقك، ولا تجرح حد، ولا تاخد حاجة مش من حقك.الناس اللي متربية على الأصول ناس شيك وأرواحهم أنيقة،لكن لما بتزيد عليهم قلة أصل، بيهجروك بالأصول..الناس المتربية على الأصول بيتعبوا في الدنيا،عكس اللي مش متربي على الأصول عمره ما بيتعب ولا في دماغه أساساً عمل إيه ومعملش إيه.في النهاية يا بخت ولاد الأصول،الأصول محدش بيتعلمها هي مبادئ يا تكون متربي عليها من بيت أهلك يا تعيش عمرك كله تسمع عنها الأصول ملهاش دعوه بالغني ولا الفقر ولا العلم ولا الجهل..قله الأصل ليها دعوه بالضمير والأخلاق والبيئة اللي خرجت منها والصح والجواب معروفين كل حاجه واضحه وكل واحد عارف هو بيعمل ايه ..ولاد الأصول موجودين دايماً وقت الشدة قبل الفرح من غير ما يطلب منهم تلاقيهم جمبك واقفين معاك سند وضهر أنت ممكن تتعلم أى حاجة فى الدنيا إلا الجدعنة و الإحساس و الأصول و الذوق دى حاجات بتبقى فى الدم ماينفعش فيها تعليم مش هينفع تعلم حد يبقى جدع وابن اصول ولا انه يبقي عنده دم.
كلنا ولاد ناس بس مش كلنا ولاد اصول !!
وشكر الله سعيهم
