تقدير الذات مش مجرد إنك تحبي نفسك…
تقدير الذات هو: إنتِ شايفة نفسك إزاي لما محدش يكون حواليكي؟
في ناس شكلها واثق جدًا من نفسها، بتتكلم، تنجح، تاخد قرارات، وتظهر قوية أمام الناس…
لكن من جواها محتاجة طول الوقت حد يقول لها:
“إنتِ كويسة.”
“إنتِ مهمة.”
“إنتِ جميلة.”
“إنتِ تستحقي.”
لأن إحساسها بقيمتها مش ثابت من جواها، لكنه متعلق جدًا بردود أفعال الآخرين.
وهنا بنبدأ نفهم إن تقدير الذات أعمق من الثقة بالنفس.
الثقة بالنفس ممكن تزيد لما أتعلم مهارة، أنجح في شغلي، أو أحقق هدف.
لكن تقدير الذات بيتعلق بإحساسي الأساسي بقيمتي كإنسان…
هل أنا شايفة إن لي قيمة حتى وأنا بمر بفترة ضعف؟
حتى وأنا فشلت؟
حتى لما حد رفضني؟
حتى لما مش بكون في أفضل صورة ليا؟
ودي نقطة مهمة جدًا.
لأن الإنسان اللي تقديره لذاته هش، ممكن يحول أي موقف بسيط إلى حكم كامل على نفسه.
حد انتقده → أنا مش كويس.
حد رفضه → أنا مش محبوب.
فشل في حاجة → أنا فاشل.
حد سبقه → أنا أقل من غيري.
وهنا المشكلة مش في الحدث نفسه…
المشكلة في المعنى اللي أنا أعطيته للحدث.
وده قريب من فكرة أساسية في العلاج المعرفي السلوكي:
مشاعرنا لا تنتج فقط عن الموقف، لكن تتأثر بالطريقة التي نفسر بها هذا الموقف والأفكار التي نكوّنها عنه.
وعشان كده، بناء تقدير الذات مش معناه إننا نقعد نقول لنفسنا جمل إيجابية طول اليوم.
لو أنا من جوايا مقتنعة إني مش كفاية، مجرد إني أقول “أنا عظيمة” ممكن ما يغيرش الإحساس الحقيقي.
إحنا محتاجين نشتغل أعمق:
أفهم أنا إمتى بدأت أربط قيمتي برضا الآخرين؟
هل اتعلمت وأنا صغيرة إن الحب مرتبط بالإنجاز؟
هل كنت بحس إني مقبولة أكتر لما أكون هادئة، متفوقة، أو أعمل اللي الناس عايزاه؟
هل بقيت بخاف من الرفض لدرجة إني أتنازل عن احتياجاتي عشان أحافظ على العلاقة؟
هل بقارن نفسي باستمرار وأشوف إن حياة الآخرين دليل على نقص في حياتي؟
وهنا بنوصل لحاجة مهمة جدًا:
أحيانًا ضعف تقدير الذات مش بيظهر في إنك تقولي “أنا وحشة”.
ممكن يظهر في إنك ترضي الجميع.
في إنك تخافي تقولي “لا”.
في إنك تعتذري حتى وإنتِ مش غلطانة.
في إنك تستحملي معاملة لا ترضيكي خوفًا من فقدان الشخص.
في إنك تقللي من نجاحك وتفضلي تقولي:
“دي حاجة عادية… أي حد كان ممكن يعملها.”
وفي إنك تكوني قاسية جدًا على نفسك، بينما مع الآخرين عندك كل الرحمة والتفهم.
عشان كده، تقدير الذات الحقيقي مش معناه إنك تشوفي نفسك أفضل من الناس…
معناه إنك تعرفي إن قيمتك مش محتاجة منافسة.
مش محتاجة تكوني أجمل واحدة.
ولا أنجح واحدة.
ولا الأكثر قبولًا.
ولا إن كل الناس تحبك.
يكفي إنك تعرفي إنك إنسانة لها قيمة، وتستحقي الاحترام، وتقدري تطوري نفسك من غير ما تكرهي نفسك في الطريق.
وأحب أسأل كل شخص بيقرأ الكلام ده:
لو اختفى مدح الناس، واختفت المقارنات، ومفيش حد بيأكد لك إنك كويس…
إيه اللي هيفضل جواكي من إحساسك بقيمتك؟
يمكن الإجابة على السؤال ده تكون بداية حقيقية لفهم علاقتك بنفسك.
كوتش رحاب زكريا
لايف كوتش ICF
مستشار أسري وزواجي ونفسي
ممارس علم إيجابي
