حادث مأساوى فى محافظة المنيا
هاجر عبد الكريم عندها ٢٤ سنة الزوجة التانية متجوزها واحد اسمه ناصر، وكان منفصل عن زوجته الاولانية اللي هيا ام هاشم بقاله سنتين، بس في رمضان صالحها وبعد رمضان جاب بيت جديد ورجع مراته الاولانية وبقا يبات هناك اسبوع وعند هاجر اسبوع، الكلام ده معجبش هاجر.
بيت هاجر فيه فرن بتقدر تخبز فيه العيش الشمسي، فكانت بتعمل العيش لناصر وعياله، والحقد مالي قلبها لانها توقعت ان مراته الاولى هتعمل مشاكل ومش هيكملوا بس لقت الدنيا ماشية هادية فالحقد ملى قلبها اكتر.
في شهر يوليو نزلت محل مبيدات حشرية جابت منه علبة “مبيد” بتاع آفة الطماطم وبلته بشوية مية وعملت بيه العيش الشمسي، ومحمد ابن ناصر جوزها اكل قدامها منه وبعتت معاه شوية للبيت، وهيا عارفة اللي هيحصل وعادي جدا، وبقا واحد يقع ورا التاني وهيا عادي.
ناصر جوزها نفسه وقع، وللاسف المادة دي مكنش ليها تحاليل معتمدة في الطب الشرعي، وعشان كدة مكانوش عارفين ايه اللي بيحصل، ولولا ان نفس المادة دي بيستخدمها ناصر في شغله وعنده شوية منهم في البيت مكانوش عرفوا المادة.
ام هاشم مراته الاولانية مكالتش من العيش بسبب انها فاكرة هاجر تكون ساحرالها حاجة في الاكل، عملالها عمل ولا حاجة من اللي بتفرق بين الازواج، بس مكانتش تعرف انها حاطة حاجة اكبر شوية من السحر.
هاجر عملت كدة وهيا في كامل وعيها، طبقا لتقرير مستشفى العباسية للصحة النفسية، يعني عملت كدة في وعيها وهيا مدركة اللي هيحصل، قالت في الاعترافات انها افتكرت انهم هيعيوا شوية بس على مين؟ النية كانت مبيتة من الاول.
٦ اطفال وزوج وام مكلومة، ورضيع اتولد بدون اب وغالبا هيكون بدون ام بعد المحاكمة، كل دول راحوا ضحية الغيرة الزوجية، واللي مش قادر اتخيله هيا كانت ازاي بتأكلهم وهيا عارفة اللي هيا حطاه في العيش وبيقعوا واحد ورا التاني ايه الجبروت ده؟؟؟
